من قزئتده ایش آختاریرام
تونس ده پرئزیدئنت ایشینی الدن وئریر
من قزئتده ایش آختاریرام
شاهین اوغلو اؤزونو اؤلدورور
قیرمیزی اوتوبوسلار منی آپاریر
قیرمیزی و چیرک اوتوبوسلار
منی آپاریر ، بیرده نم نئچه میلیون ایشسیزی
تهران دریادیر
من بالیقلاری چوخ سئویرم
سن بالیقلار بورجوندانسان
تهراندا هوندور هوندور بورجلار وار!
قیرمیزی چیرک اوتوبوسلا دولانیریق آزادلیغین باشینا
من قزئتده ایش آختاریرام
ایش آختارمیر منی قزئت ده
کیمسه تانیمیر منی
هامی تلسیر
کیمسه یاندیرمیر سیقاریمی
آزادلیق گیجللـنیر
النیر باشیما
تونسده داش یاغیر انقلاب
ایش تاپانمیرام
شاهین اوغلو اؤزونو اؤلدورور
تهران دریادیر
هامی هامیدان اوزاقدی
قیرمیزی چیرک اوتوبوسلاردا هامی هامییا یاخینلاشیر
بورون بورونا دایانمیشام بیر افغان فهله سیله
ایش آختاریرام
قولاغیمدا سئزن آکسو
"گئری دؤن-گئری دؤن"
دؤنه مم سئزنجیم ، ایش آرییوروم!
بالیقلاری چوخ سئویرم
قیرمیزی روژلو آزاد بالیقلاری
سن بالیقلار بورجوندانسان
من خرچنگ بورجوندان
تهران دریادی
بوغولورام- توسسودن!
چینده بیر دنیز یئمیی
من خرچنگ بورجوندانام-سن بالیقلار
سئزن آکسو قولاغیمدا:
"!گیت"
گئدییورومده سئزنجیم ، ایش آرییوروم!
اورگیم سیخیلیر دؤرد کورک آراسیندا
ببخشید پیاده میشم
جئبیم وورولور بیریسینه
بالیقلار دیکسینیرلر
دوداغیم اوچوقلاییر
"تونسده انقلاب هارایا چاتاجاق؟"-
بیلمیرم آغا-
من قزئتده ایش آختاریرام
بیریسی منیم جئبیمی وورور
سئزن آکسونو چیخاردیرام قولاقلاریمدان
آلو سعید منه پول یئتیر-
همی ده بیر ایکی زندان شعری
تهران دریادی
بوغولور هامی
فردوسی هوروت هوروت باخیر قیرمیزی چیرک اوتوبوسلارا
قزئتلری تکجه ایشسیزلر آلیر
تهراندا یاغیش شایعه سی دوز چیخیر
ایسلانیر قزئتده تونس انقلابی
یویولور شاهین اوغلونون قانی قزئتده
سیقاریمی سؤندورور یاغیش
کیمسه یاندیرماییر سیقاریمی
هامی تلسیر
هامی هامیدان اوزاقدی
دوستلاریم بوشانیر سئوگیلیلریندن
هامی بوشانیر سئوگیلیلریندن
هاوا دولور
هاوا بوشالیر
دونیادا یالنیزلیق چوخالیر
سئزن قولاغیما پیچیلداییر: "آغلاما گوزل"
- ...
هامی هامییا یاخینلاشیر قیرمیزی- چیرک اوتوبوسلاردا
خرچنگلرله بالیقلار نئجه یاشاییرلار دنیزده؟!
من بالیقلاری چوخ سئویرم
قیرمیزی روژلو آزاد بالیقلاری
من اوتوبوسلاردا اوچوقلاییرام
قزئتلر منه ایش تاپمیرلار
جئبیم چوخ رومانتیکدی
جئبیم وورولور بیر اوغرویا
سعید منه پول گتیرجک- بیرده نئچه زندان شعری
سئزنین باتریسی قورتاریب موبایلیمدا !
آیدین آراز
سن اویانا پاییز گلدی.
قارقالار دولوشدو كوچه میزین یوخوسونا.
و قورویوب تؤكولدو
بوتون سارماشیق بوتالاری...
بیلیرم
سحرلریم آلما قوخومایاجاق داها
و، قوشلارین خاطیره سی
دیغلاداجاق منی...
ملیحه عزیز پور
یاشیل یارپاقدا
نوخود بویدا ساری لكه وار،
اوچ گوندور باخیرام...
بو اوچ گونده سولوب
قونشو بوداقلارداكی بوتون یارپاقلار.
سیراغا گون لكه نوخود بویدا ایدی،
دونن ده.
بو گون بیر آز بؤیویوب،
لاپ آز،
ایینه اوجو قده ر.
دوشونورم بئله گئتسه
بو یارپاق سولماز،
پاییز اونا
توخونمامیش كئچیب گئدیر.
یارپاقسیز آغاجدا
یاشاماق ایسته ییر سونونجو یارپاق.
تك الی ایله برك- برك
یاپیشیب بوداقدان
تك الده گوجه باخ!
فیكرت صادیق
منی آلدادایدین پاییزا کیمی
سولان یارپاقلارا چاتایدیم باری
منی آپارایدین پاییزا کیمی
منه آغلایایدی پاییز تویلاری!
ائله باهار کیمی سئوه یدین منی
بیر آغاج اولایدیم باخیشلاریندا
آچیب حیس لریمی قیز ساچی کیمی
آخیب دورولایدیم باخیشلاریندا.
بیر مکتوب یازایدین منیم آدیما
توفانلی دنیزده آدا تاپایدیم.
بیر مکتوب یازایدین منیم آدیما
یئریمی مکتوبدا سالیب یاتایدیم.
یاشیل یارپاقلاردا اؤله بیلمیرم
منی بو باهاردا دوشورمه یه یدین.
منی آپارایدین پاییزا کیمی
اوردا یاغیشلارلا اؤلوب گئده یدیم.
اوردا بیر قاتارا مینیک باشلانیب
منی آلدادایدین پاییزا کیمی.
اوردا یوللار تویلو، گؤیلر یاغیشلی
اوزه یدیم، اوزه یدیم دنیزه کیمی...
قشم نجف زاده
آیدین آراز
پیشان پیشان خان پیشان
هامیدان قورخان پیشان
نئیه یئدین جوجه می؟
او ساری توكلوجه می
سنی هارادا تاپسام
گزیب ایزینه چاتسام
قولاغینی بوراجام
سندن آجیق اچاجام
ملیحه عزیز پور
