یاشیل یارپاقدا
نوخود بویدا ساری لكه وار،
اوچ گوندور باخیرام...
بو اوچ گونده سولوب
قونشو بوداقلارداكی بوتون یارپاقلار.
سیراغا گون لكه نوخود بویدا ایدی،
دونن ده.
بو گون بیر آز بؤیویوب،
لاپ آز،
ایینه اوجو قده ر.
دوشونورم بئله گئتسه
بو یارپاق سولماز،
پاییز اونا
توخونمامیش كئچیب گئدیر.
یارپاقسیز آغاجدا
یاشاماق ایسته ییر سونونجو یارپاق.
تك الی ایله برك- برك
یاپیشیب بوداقدان
تك الده گوجه باخ!
فیكرت صادیق
یئر گؤیو، داغ داغی، داش داشی سئودی
قاش، گؤزه وورولدو، گؤز، قاشی سئودی
تانری ناخیش ووردو نقاشی سئودی
بیز نییه سئومه یك بیر- بیریمیزی؟!
چمن لر تورپاغا خالی چكیر سه
خالیدا یاشیلی، آلی چكیر سه
آری چیچك لردن بالی چكیر سه
بیز نییه سئومه یك بیر- بیریمیزی؟!
عؤمور گؤز قیرپیمی، فرصت آزدی سا
اوچوب الیمیزدن گئدن یازدی سا
كؤنول سون نفسده سینان سازدی سا
بیز نییه سئومه یك بیر- بیریمیزی؟!
اولدوزلار سایریشیب گؤز وورور آیا
چشمه لر چاغلاییب تؤكولور چایا
سئون لر گلیر سه هر گون دونیایا
بیز نییه سئومه یك بیر- بیریمیزی؟!
گول شئهدن گوج آلیر، مامیر قایادان
كؤز اوددان قیزاریر، چیچك حیادان
سوزولوب گلیرسه كؤكدن مایادان
بیز نییه سئومه یك بیر- بیریمیزی؟!
عؤمرون هم سئوینجی هم آهی وار سا
پروانه یانغیسی شام آهی وار سا
آدمین جنتده تاماهی وار سا
بیز نییه سئومه یك بیر- بیریمیزی؟!
یاغیش چیچك لرین اؤپور اوزونو
داملا پیچیلتییلا دئییر سؤزونو
شلاله قایادان آتیر اؤزونو
توفان داغی سئویر، دالغا دنیزی
بیز نییه سئومه یك بیر- بیریمیزی؟!
بیز نییه سئومه یك بیر- بیریمیزی؟!
زلیم خان یعقوب
منی آلدادایدین پاییزا کیمی
سولان یارپاقلارا چاتایدیم باری
منی آپارایدین پاییزا کیمی
منه آغلایایدی پاییز تویلاری!
ائله باهار کیمی سئوه یدین منی
بیر آغاج اولایدیم باخیشلاریندا
آچیب حیس لریمی قیز ساچی کیمی
آخیب دورولایدیم باخیشلاریندا.
بیر مکتوب یازایدین منیم آدیما
توفانلی دنیزده آدا تاپایدیم.
بیر مکتوب یازایدین منیم آدیما
یئریمی مکتوبدا سالیب یاتایدیم.
یاشیل یارپاقلاردا اؤله بیلمیرم
منی بو باهاردا دوشورمه یه یدین.
منی آپارایدین پاییزا کیمی
اوردا یاغیشلارلا اؤلوب گئده یدیم.
اوردا بیر قاتارا مینیک باشلانیب
منی آلدادایدین پاییزا کیمی.
اوردا یوللار تویلو، گؤیلر یاغیشلی
اوزه یدیم، اوزه یدیم دنیزه کیمی...
قشم نجف زاده
