كیچیك آدینی وئر منه
كیچیك لر گؤزل دی
بیر دنیز قوشونون دیمدییندهكی بالیق كیمی
كیچیك آدین بؤیوكدور و ایسسی
هند اوقیانوسونوعرب چؤللربنه قووشدوران كؤرفز كیمی
دنیز كاپتانلارینین اورهیی تك
و خرچنگ لر چوخ سئویرلر ایسسی سویو
كیچیك آدینی وئر منه
قویوم بو قالماقاللی كؤرفزین اوستونه
اوشویورم
وئر كیچیك آدینا بورونوم
ایسلانمیشام شرجی‌سینده آدینین
كیچیك آدینی وئر قورونوم
كیچیك آدین آغیرلیق ائدیر
دنیز سینه سینه آغریرلیق ائدن بیر گمی كیمی
بالیقلارینی نفت لكه‌سی اؤلدورن بیر دنیز سوسغونلوغو تك
قورخورام آدینین آلتینا گئدم
یوخ!
كیچیك آدینی وئر منه
لنگر كیمی آتیم بو آدایا
بو آدسیز آدایا
بو آدامسیز آدایا
آدین بورانی آدا ائدر
كیچیك آدین
یئل دیر
اسیر دنیزه
بونو گوندوزلر دوغویا،گئجهلر باتییا دالغانان
گمی بایراقلاری دئییر
آدینلا یولا دوشور گمی لر
آدینلا دییر بیربیرینه دنیز
آدینلا گمی بئلیطلری باطل اولور
آدیندا حركت وار
آدین دا پارادوكس
كیچیك آدینی وئر منه
آدین لازیم‌دی
ایتیب مغرور گمیم بو قالماقاللی كؤرفزده
یاندیر او دنیز فناری اولان كیچیك آدینی
سؤندور بو قوشقولو قارانلیغی
آدینا قوناق گله‌جم
سؤیله گؤزله‌سین لیمان لاردا
یاپایالنیزام
گؤز یاشلارینا كیمسه اینانمایان تیمساحام
رقصی آلیقشلانمایان دولفینمس
یاپایالنیزام
مجوزی باطل اولوب بالیقچیام
تورونو خرچنگ لر چئینهییب بالیقچی
بالیقلار گولور ساققالینا بالیقچی
كیچیك آدینی وئر منه ، قوی بو كؤرفز ساكین‌لشسین
ساحیلده ایكی نفرلیك اوتوراجاق‌دا ایلشیم آدینلا
گونون باتماسینا باخیم
هوس‌لنیم كیچیك آدینا یاخیلان قیرمیزی گونش شعاع‌لارینا
سونرا آدینی قویوم بیر دنیز قوشونون اوستونه اوچوردوم دنیزه
دیمدیینده بیر كیچیك بالیق
و كیچیك‌لر گؤزل‌دیرلر
سونرا آدینی سسلهییم اوجادان
كیچیك آدینا ییغیشسین بالیقلار
كیچیك آدینی ائشیتسین ترك اولونموش مین‌لرجه بالیق قولاغی
سونرا
آدینین تئلینی ایلیشدیریم بارماغیما بیر اوچورتما كیمی
قاچیم یوكسلسین آدین
و سونرا قاییدیم هوتئلدهكی اوتاغیمین بالكونون دا
كیچیك آدینین ایسسی لیینه فكرلشیم
بونا كی خرچنگلر ایسسی سویو سئورلر
و بونا كی نئجه دئیم سنه:
كیچیك آدینی وئر منه
آدیم سیجیللیمده تك دیر.
شاعیر: (آیدین آراز)