فلكین قانلی الیندن بیر آتیلمیش یئره اندی،
بیر فلاكت آنانین جان شیره سیندن سودون امدی،
بوللو نیسگیل شله سی چئگنینه آلدی،
تای توشوندان دالی قالدی،ساری گول مثلی سارالدی،
گونو تك باغری قارالدی.خان چوبان سیز سئله تاپشیرسین اوزون،
یوردوموزا بیر سارا گلدی، بیر وفاسیز یار الیندن سانا گلمز یاراگلدی،
بیریازیق قیز، جان الینده ن جانا گلمز جانا گلدی،
گله جكده ((الموت)) دامنه سینده ن بورایا درمانا گلدی،
بیر آدامسیز ((سورو)) آدلی،الی باغلی، دیلی باغلی!
((سورو)) كیمدیر؟
سوروبیر گول دو جهنمده بیتیبدیر،
سورو بیر دامجی دی گوزده ن آخاراق اوزده ایتیبدیر،
سورو یول یولچوسودوراگری ده یوخ دوزده ایتیبدیر،
سورو بیر مرثیه دیر اوخشایاراق سوزده ایتیبدیر،
او كونول لرده كی ایتمیش دی ازلدن، اودو گوزده ن ده ایتیبدیر،
سورو بیر گوزلری باغلی،اوزو داغلی، سوزو داغلی،
اولوب هاردان هارا باغلی؟بوشلاییب دوغما دیارین،
اوموب البته یاریندان، ال اوزوب هرنه واریندان،
قورخماییب شهریمیزین قیشدا آمانسیز بورانیندان،
نه قاریندان،
گزیر آواره تاپا یاندیریجی دردینه چاره،تاپا بیلمیر،
چوخ سئویر عشقی باشیندان آتا، امما آتا بیلمیر،
اووا باخ اووچو دالینجا قاچیر آمما چاتا بیلمیر،
ایش دونوب لیلی دوشوب چوللره مجنون سوراغیندا،
شیرین الده تئشه داغ پارچالاییر فرهاد اوتورموش اوتاغیندا،
تشنه لب قو گور نئجه جان وئری دریا قیراقیندا،
وارلیقین سون اثری آز قالیر ایتسین یاناغیندا،
سانكی بیر كوزدو بورولموش كوله وارلیق اوجاغیندا،
كوزه ییر پیلته كیمین یاغ توكه نیب دیر چیراغیندا،
بوی آتیر رنج باغیندا، قوجالیر گنج چاغیندا،
بیر آدامسیز ((سورو)) آدلی،الی باغلی،دیلی باغلی!
((سورو جان)) اومما فلكدن، فلكین یوخدو وفاسی،
نه قدر یوخدو وفاسی،او قدر چوخدو جفاسی،
كوهنه رقاصه كیمین هر كسه بیر جوردور اداسی،
اوآیاقدان دوشه نی ایستیر آیاقدان سالان اولسون،
او تالانمیش لاری ایستیر گونو گوندن تالان اولسون،
او آتیلمیش لاری ایستیر هامیدان چوخ آتان اولسون،
او ساتیلمیش لاری ایستیر قول ائده ركن ساتان اولسون،
نئیله مك قورقو بوجوردور،فلكین نظمی ازلدن اولوب اضدادینه باغلی،
قاراسیز آغلار اولانماز، دره سیز داغلار اولانماز،
اولوسوز ساغلار اولانماز،گره ك هر بیر گوزه له بیر دانا چیركین ده یارانسین،
بیری انسین یئره گویدن بیری عرشه اوجالانسین،
بیری چالسین ال آیاق غم دنیزینده،بیری ساحیلده سئوینج ایله دایانسین،
بیری ذلت پالازین باشه چكیب یاشادا آنجاق،
بیری نین بختی اویانسین، بیری قویلانسادا نعمت لره یئرسیز،
بیری ده قانه بویانسین،
آی آدامسیز سورو آدلی،ساچلاریندان دارا باغلی!
نئیله مك ایش بئله گلمیش، چور گلنده گوله گلمیش،
فلكین اگری كمانیندا اولان اوخ آتیلاندا دوزه دگمیش،
دیلسیزین باغرینی دلمیش،اگری قالمیش دوز اگیلمیش،
اونو خوشلار بو فلك ائل ساراسین سئللر آپارسین،
بولبول حسرت چكه رك گول ثمرین یئللر آپارسین،
قئیسی چوللرده قویوب لیلی نی محمللر آپارسین،
خسرو،شیرین ایله ال اله وئرسین فرهادین قامتین اگسین،
باخاراق چرخ زمان نشئه یه گلسین،كئفه دولسون،
((سورولار)) سولسادا سولسون،
سیسقا بیر اولدوز اگر اولماسا اولدوزلار ایچینده،
بو سماء ظولمته باتماز،داش آتان كول باشی قویموش داشینی
اوزگه یه آتماز، سن یئتیشسن هدفه اوندا فلك مقصده چاتماز،
داها افسانه یاراتماز،
((سورو)) آی باشی بلالی، زامانین قانلی غزالی!
((سورو)) بیر قوشدور خزان آیری سالیبدیر یوواسیندان،
ال اوزوبدور آتاسیندان،
جوجه دیر حیف اولا سود گورمه ییب اصلأ آناسیندان،
او زلیخا كیمی یوسیف ایین آلمیر لیباسیندان،
بونا قانع دیر تنفس ائله ییر یار هاواسیندان،
درد وئره ن درده سالیب آمما خبر یوخ داواسیندان،
آغلاییب سیتقایاراق بهره آپارمیر دوعاسیندان،
او بیر آیینه دیر رسام چكیب اوستونه زنگار،
اوندا یوخ قدرت گفتار،اوزو چیركین دیلی بیمار،
گنج وقتینده دل آزار، گوره سن كیمدی خطاكار،
گوره سن كیمدی خطاكار!؟
شاعر :عاصم اردبیلی
آردی
بیلیرم كی الیمزدن گلر اگر ال اله وارساخ
