سوغان سویا-سویا آغلایان قادین،
عؤمرون سوغان کیمی آجیدی، آجی.
ملک‌سن، قیریلیب قولون-قانادین،
دردی وئرن آللاه وئرمیر علاجی.
گؤزوندن سوزولن یاشی کیم سیلر؟
«گؤز یاشی» دئدیگین ندی؟
آجی سو.
بیر شیرین اؤپوشله باشلار سئوگیلر،
سونوندا همیشه سوغان آجیسی.
او اؤپوش یاندیرماز دوداقلارینی،
سویویوب اود دولو او قوجاق ایندی.
سایار بیرجه-بیرجه بارماقلارینی
هر گئجه یودوغون قاب قاجاق ایندی.
گلر «ار» دئدیگین هر گئجه یاری،
بیر قاشیق خؤرگین باخماز دادینا.
یوخودا دیلیندن قوپان آدلارین
بیری ده بنزه‌مز سنین آدینا…
سوغان سویا-سویا آغلایان قادین،
گؤزونون یاشینی سیله بیلمرم.
نئیلیم، من سنه اؤزگه‌یم، یادام،
نئیلیم، یانینا گله بیلمرم.
بیر سئوگی گزیرم دونیادا من ده،
او سئوگی هاردادی؟
بیلمیرم آنجاق.
…کیم سوغان سویاجاق منیم ائویمده،
سوغان سویا-سویا کیم آغلایاجاق؟!..
رامیز روشن