من یانیرام آرتیق،
و كولومله دیری یَم
مین لرجه جاوابسیز سورغو ایله قول _بویون
كیم اورییمده كی دنیزده اوزه جَك؟
كیم باخیشلاریمین دیلمانجی اولاجاق؟
كیم یاشایاجاق دوداغیمداكی شعرلرله ؟
كیم اؤله جك؟
كیم ساچلاریمی داغیدیب
كیم ساهمانلایاجاق یئنی دن؟
كیم ایچیمده كی اؤلونو قویلایاجاق؟
كیم سؤزلریمده كی یارانی باغلایاجاق؟
كیمین گؤزلری یاشالاجاق دومانیمدان؟
كیمین بارماغی دیشله نه جك حئیرَتیمدن؟
كیم دیسكینه جك سوسماغیمدان؟
كیم ایله بؤلوشه جه یم كؤهنه لمیش شنلیك لریمی؟
كیم قیراجاق
هؤرومجك لرین زیغلی اؤپوشلرینی گؤوده مدن؟
هانكی قاریشقالارین بایرام آخشام لارینا پای اولاجاق
سئللول لاریم !؟
هانكی تورپاغین بوینونا ساریلاجاق قول لاریم؟
هانكی كؤرپو قورخاجاق آیاق لاریمین قورخمازلیغیندان ؟
هانكی پری لر،
هانكی جین لر،
اوداما قوناق گله جك لر گئجه لر؟؟!
هانكی بؤغونتو سؤندوره جك باخیش لاریمین لامپاسینی؟
هانكی سس سیندیراجاق سوسغونتومو؟
هانكی ایلدیریم یاراجاق قارانلیغیمی ؟
هانكی قارانلیق بَللندیره جك آییمی
_ اولدوزومو ؟
هانكی قیز؟
سیجیللیمده كی اوغلانلا ائوله نه جك ؟
سئوه جك؟!
هانكی اورَك اوزوله جك اوزولمه ییمدن ؟
هانكی دوداق بوزوله جك كوسمه ییمدن؟
هانكی آنا دوغاجاق _
_ منیم كیمی بیر "پارادوكس " و یئنی دن
هانكی سی سود وئریب، دؤزه جك قوساق لاریما؟
هانكی سی دیل اؤیره ده جك ؟
هانكی سی آغلایاجاق مزاریمدا ؟
هانكی ....
....سی ؟
من یانیرام آرتیق....
آیدین آراز